Eze 35 | ZomZIV | STEP | TOPA thu kei tungah hong tunga:

Ezekiel 35

Edom Siat ding Genkholhna

1 TOPA thu kei tungah hong tunga: 2 “Mihing tapa aw, Seir Vum lam nga inla, a siat nading genkhol in: 3 Hih in Thupipen TOPA gen ahi hi: Seir Vum aw, nang langkhatah ka pang hi. Nang langah ka khut ka zan dinga, bangmah a kimang lo gam simtham kong suaksak ding hi. 4 Na khuapite ka siasak dinga gamkhing ka suaksak ding hi. Tua ciangin keimah TOPA ka hilam nong thei ding uh hi. ^a

5 “’Bang hang hiam cih leh nang in tang lai-a kigalneihna na ciamteh gige-a Israel-te dan thuak ding hun nunung pen a tun laitak, a lungkham laitakun amaute namsau-a thah dingin na piakhia hi. 6 Tua ahi ciangin ka nuntakna ka lo hi, TOPA in cikhia a, na sisan ka luangsak dinga tua in nang hong sulzuih ding hi. Sisan luansakna na muhdah loh nungsangin sisan luanna in nang hong sulzuih ding hi. 7 Bangmah a kimang lo Seir Vum gamkhing ka suaksak dinga, tua lai-a a ciah a kuante ka khaktan ding hi. 8 Na mualliante misi tawh ka dimsak dinga, na mualneute tung, na kuam sung le na kuam thukpite sungah namsau-a kithatte a puk ding uh hi. 9 Gamkhing kong suaksak den dinga; na khuapite ah a kiteng kei ding hi. Tua ciangin keimah TOPA ka hilam nong thei ding hi. ^b

10 “’Bang hang hiam cih leh nang in keimah TOPA ka om nangawnin, “Hih minam nihte le a gamte uh ei ading ahi hi; amaute ei tanh dingin i la ding hi,” na ci khin hi, 11 tua ahi ciangin Thupipen TOPA in ka nuntakna ka lo hi, nang tungah thu kong khen ciangin amaute na muhdah mana na hazatna le na hehna tawh kizui-in nang kong thuk dinga, amaute lakah kei ka kitheisak ding hi. 12 Tua ciangin Israel mualte langkhat ah a zakdahhuai na gente keimah TOPA in ka zak khit lam na thei ding hi. Nang in, “Amaute a kikoihdak hi a, i nawmvalh dingin ei hong kipia ahi hi,” na ci hi. 13 Kei langkhat ah kiliansakin kidawm het loin kam na pau a, keimah in ka za zo hi. 14 Hih in Thupipen TOPA gen ahi hi: Leitung buppi a lungdam laitakin nang gamkhing kong suaksak ding hi. 15 Bang hang hiam cih leh Israel innkuante gouluah gamkhing a kisuahsak laitakin nang na lungdam hi; nang zong a tuaci-in kong bawl ding hi. Seir Vum aw, nang le Edom-te khempeuh gamkhing hong kisuaksak ding hi. Tua ciangin amaute in keimah TOPA ka hilam a thei ding uh hi,’ ci in,” hong ci hi.